紅魔着火大鬧維拉

猪拉多纳

曼聯老帥費格遜今季存心複製99年3冠王勝利方程式，手執4大射手輪住用，大軍近期一再施展旋風式後勁反勝對手，隊內正、副選前鋒全面上力，重現魔性，今晚乘勇揮軍作客阿士東維拉贏面高，但讓一球嫌多，唔玩上盤。「紅魔鬼」現時攻強守弱，近11戰全開大盤，條路咁順，不妨追多口大！

（有線300及200台周日凌晨1時30分直播）
4大鋒霸輪流發威

費爵爺在曼聯領軍26載，最威水嗰期都係99年豪奪3冠，昔日黑、白雙煞約基、高爾、舒寧咸同蘇斯克查各擅勝場，老費今季用番呢條勝利方程式，重金簽下尹佩斯，聯同朗尼、韋碧克同查維亞靴南迪斯組成恐怖鋒線，4大天王以尹佩斯同朗尼為主，季初兼顧幾條戰線綽綽有餘，上場歐聯作客布拉加安排尹佩斯先任後備，落後先派呢位當弗射手搏殺，結果最後十分鐘由尹佩斯、朗尼同「小豌豆」各入一粒反勝，對手可謂防不勝防。

「紅魔鬼」今季喺各項賽事先後7次反勝對手，睇落真係有啲99年3冠王時期影子，不過，佢哋依家最大問題都係後防中路不穩，喺後防重心尼曼查維迪未復出之前，相信呢個問題都難以解決。中堅里奧費迪南年紀一把，踢得密頂唔順，莊尼伊雲斯始終唔係大將，難以予人信心，基斯史摩寧傷愈未有十足狀態，佢哋今季聯賽10戰只得2場保持清白之身，今場讓到一球，隨時要入3球先開到上盤，風險真係好高，唔多抵玩。
維拉雙煞打突擊

阿士東維拉上次喺主場贏曼聯已經係95年，佢哋當然好想一搔17年之癢贏番鋪，但想還想，都要面對現實，大軍依家實力有限，今季隨時要護級，對住「紅魔鬼」只能望唔好輸得太難睇。佢哋兩大攻擊主力艾邦拉荷及賓迪基都有士哥能力，並非全無反擊之力，對住「紅魔鬼」條豆腐防線有機會搵到食，預期今戰入波會多，大盤有計！