拿玻里搏殘難殺迪

猪拉多纳

今日成廿幾場波，阿King想集中同大家傾下歐霸盃，意甲球隊一向視歐霸賽事為雞肋，其中F組嘅拿玻里兵源有限，教頭馬沙利寧願專心爭來屆歐聯席位，作客嘅烏克蘭球隊迪尼普有心有力，今場要搶分冇乜難度，「讓球客勝」要得過。

（周五凌晨2時開賽）

同上屆踢歐聯場場搏盡相比，拿玻里今屆降格角逐歐霸明顯立油好多，一來意甲球隊一直對歐霸敷衍了事，二來該隊板凳深度又不足，教頭馬沙利用極都係得12、13人，實在難以兼顧兩條戰線。尤其係季初弗到爆嘅烏拉圭中鋒卡雲尼，經過奧運、聯賽、歐霸同世界盃外圍賽嘅頻密賽程後，已經踢到殘晒。

拿軍一向靠卡雲尼數胡，當佢跌Watt後，無論用彭迪夫、伊度亞度華加斯定恩斯治尼，都未能止住頹勢，因此馬帥寧願喺歐霸慳番啖氣，全力爭聯賽前三嘅歐聯席位好過。相反造訪嘅迪尼普對歐霸有heart，加上近八仗贏六場，受讓絕對筍爆，「讓球客勝」有計。
AIK頂得住燕豪芬

同組嘅AIK蘇納剛於瑞典超收咧，可全力應付歐霸，主場頂得住荷甲班霸燕豪芬，揀「讓球主勝」。最後G組士砵亭今季曳到唔恨，有負葡超Big3之名，今晚迎戰比利時球隊亨克，仲要讓波純粹係名牌效應，「讓球客勝」逾2倍非常抵玩。