拜仁鑊氣勁搵「里」開餐

猪拉多纳

拜仁慕尼黑今晚喺歐聯F組主場出擊，迎戰未有分落袋嘅里爾，呢組巴迪、華倫及拜仁同得6分三強鼎立，邊隊失分畀最「好食」嘅里爾，分分鐘要降格踢歐霸盃！今仗一於博拜仁大炒一場，1.46倍「讓球主勝」咪嫌熱。（有線63及203周四凌晨3:45直播）

雖然拜仁之前畀利華古遜破咗不敗金身，不過佢哋表現實在唔係差，只係偶然運滯啫！最緊要係輸完即刻彈番起，上場作客漢堡隨即大勝3:0添。佢哋開季以嚟成績咁好，主要原因係中前場人腳充裕，個個落到場都爭取表現，自然入球停不了。近期洛賓同列貝利都可以輪流休息，呢個安排絕對係好事，今晚無論出邊個踢正選，都唔會影響數胡能力，呢點正正係拜仁今季可怕之處。
里爾騰騰震3戰輸晒

里爾今季持續不振成績差，所以歐聯頭3場分組賽全負，「張峰」一啲都唔感到意外，始終近兩年一有主力彈起就被挖角，戰力大不如前，今晚作客如狼似虎嘅拜仁，睇怕都係有得震冇得瞓！

歐聯F組

張峰來料：拜仁（讓球主勝）