薩克達奇兵擋車

猪拉多纳

藍戰士跌Watt讓波冇着數

要數今屆歐聯分組賽最大驚喜，非烏克蘭勁旅薩克達莫屬！當初睇E組名單，全世界正路都睇好車路士同祖雲達斯出線，不過依家反而由薩克達帶出！如果各位有跟開小弟嘅推介，就知薩克達嘅領先唔係「符碌」，實情佢哋陣中都係實而不華嘅好波之人。今晚作客衞冕嘅車路士，有力再一次向世界球迷展示實力，受讓咁筍，幾大都撐1.83倍「讓球客勝」啦！（有線64、204周四凌晨3:45直播）
森巴四重奏踢爭氣波

薩克達上場主場已經以2:1擊敗車路士，有跟小弟貼士嘅朋友應該執番多少。事實上，佢哋今季喺烏克蘭不斷贏波，之前作客冇運先畀祖雲達斯逼和，依家主場贏埋車路士後，實在唔應該再被忽視。建議喺薩克達仲未製造更多驚人戰果之前，可以繼續捧場，所以今場受讓就更加超級抵玩。

鍾意名牌嘅朋友或者未必咁Like薩克達，因為無乜名牌球星，但其實佢哋已經有球員畀其他球會睇中，好似中場靈魂韋利安就係熱刺嘅頭號目標。巴西國家隊日前點兵，薩克達嘅「森巴四重奏」韋利安、費蘭甸奴、阿歷士泰斯拿同雷斯阿祖安奴居然全部落選，領隊文奴文尼斯就畀傳媒插到開花，話佢淨係信名牌！所以「森巴四重奏」有必要喺今場大踢打爭氣波，向文奴文尼斯示威。
車仔硬仗連場失波多

車路士近期無論內外都係硬仗連場，林柏特受傷後，桑馬達、夏薩特同奧斯卡杜斯山度士「三核心」都無乜點威過，近兩場主場又畀曼聯射入7球咁多，成隊狀態似乎有啲回落。最弊係佢哋今場若果贏唔到，就好有可能畀祖雲達斯爬頭，搶走小組次名位置，焗攻之下更加有利薩克達嘅快速反擊啦！

歐聯E組

頂占筍盤：薩克達（讓球客勝）
薩克達聯賽23連勝

‧薩克達近4次造訪英格蘭球會，有3次落敗。

‧車路士上屆3場主場賽事全勝，共入10球冇失波。

‧薩克達於聯賽連勝走勢已達到23場。
歐聯賽制

32支球隊分8組踢雙循環分組賽，每組首、次名躋身16強淘汰賽，第3名轉戰歐霸盃。