三箭大屠殺岡薩多

猪拉多纳

日職尚餘四輪賽事，榜首雙雄廣島三箭同仙台維加泰雙雙甩開第三位浦和紅鑽六分，已成單打獨鬥之局，三箭球差領先三粒，今輪周中快車主場對包尾大幡札幌岡薩多必盡數對手增加優勢，王牌射手佐藤壽人可以搽定chalk粉準備數胡，大細中位數調升至3.5球，照捧大盤！

（now 633周三晚6時直播）

日職鬥到最後直路，廣島三箭似乎有多少腳軟，對上三場贏唔到，走勢麻麻，不過天無絕人之路，三箭喺小低潮中迎來金鑽反彈餐士，今仗對手札幌岡薩多本季聯賽30戰輸24場，作客15戰輸14場失47粒，上場造訪FC東京又吞五蛋，但岡薩多之前作客失驚無神爆冷贏浦和紅鑽，並非全無反抗之力，三箭唔可以掉以輕心。
三箭射手如雲

岡薩多好失得通街都知，咁廣島三箭入唔入得先？大軍擁有殿堂級射手佐藤壽人，呢位名將今季進入職業生涯高峰期，喺聯賽轟入廿粒穩佔射手榜首，依家球隊僅憑得失球壓住仙台維加泰，佐藤壽人必定分外落力爭取士哥，加埋石原直樹、森崎浩司等綠葉幫手，有本錢大炒對手！大細中位數3.5球雖然有風險，但堅信三箭會由頭攻到尾，要大！