曼城拒絕陪跑狙擊阿積士

猪拉多纳

奇迹，隨時喺足球場上發生；命運，就始終要靠自己掌握，想講嘅係曼城歐聯之旅，呢支英超冠軍上輪作客輸畀阿積士後，看似要提早畢業，不過小弟就唔信佢哋會就此放棄。事隔兩周，今晚曼城返主場再戰荷蘭「一哥」阿積士，唔單止要搶救命三分，仲要贏番場漂亮勝仗，話畀同組嘅皇馬同多蒙特聽，佢哋唔係陪跑分子，所以今場撐1.98倍「讓球主勝」！（有線64及204周三凌晨3:45直播）

曼城喺「死亡D組」3戰得1分排包尾，但畢竟最後3場分組賽有兩場係主場出擊，贏晒的話，絕對有機會趕上出線尾班車，今晚曼城主場迎戰同組實力相對較弱嘅阿積士，就係重振雄風嘅好時機。事實上，曼城最近18次主場出擊，取得14勝4和佳績，若果今場抱住破釜沉舟嘅決心出擊，要大勝一場唔係難事。
阿積士作客5戰不勝

阿積士上場贏曼城可以話係近年歐聯代表作。呢支荷甲勁旅有基斯甸艾歷臣及施安迪莊等新星壓陣，可惜大賽經驗始終輸蝕，尤其條防線差唔多全部都係20出頭，表現不穩無可厚非，再者佢哋荷甲加埋歐聯，作客已連續5場不勝，明顯就係欠缺經驗，所以今晚去到曼徹斯特，隨時有被炒危機。

歐聯D組

頂占筍盤：曼城（讓球主勝）