阿仙奴「＋１」雪恥

猪拉多纳

史浩克主弱客強有攤路

歐聯B組賽事，史浩克04上次作客以二比○清脆擊敗阿仙奴，不過今次返回主場再戰，史浩克讓波唔太抵玩，始終史浩克積分上有優勢，今場和波都冇蝕底，而且阿仙奴講級數唔會差得過主隊，波童寧願揀兵工廠「讓球客勝」。

（有線62及202台周三凌晨3時45分直播）

未踢上輪比賽之前，阿仙奴喺酋長球場踢歐聯從未輸過畀外國球隊，史浩克能夠創造歷史，表現的確抵讚；不過今次主客互調，史浩克成為讓波一方，情況就有啲唔同。首先，史浩克上場贏波後已經取代阿仙奴嘅榜首位置，只要今場唔輸波，下輪主場擊敗奧林比亞高斯便夠分出線，相反如果今場落敗，同時間奧林比亞高斯又擊敗蒙彼利埃，史浩克唔單止會跌落第二位，而且下輪更會變成爭出線關鍵戰，到時壓力肯定大增，所以站在史浩克立場，今場和波絕對可以接受，根本冇需要急於求勝。
兵工廠下風波顯鬥志

其次，史浩克今季表現最好嘅幾場賽事，其實都喺客場取得，除擊敗阿仙奴，分組賽贏奧林比亞高斯、聯賽擊敗死敵多蒙特都係下風波，反而主場出擊卻偶有失手，好似第二輪分組賽曾打和蒙彼利埃，兩周前聯賽面對紐倫堡亦一度陷於苦戰，今次被一致睇好隨時又甩拖。

阿仙奴近況唔算好，但勝在有鬥心，先有上周英格蘭聯賽盃喺落後四球之下加時反勝雷丁晉級，就算上場英超輸畀曼聯，球隊落後兩球兼有韋舒亞被逐，仍能靠辛迪卡索拉完場前破蛋，落後仍無損戰意。況且講球員質素，阿仙奴唔會比史浩克差，歐洲賽經驗甚至比對手仲好，有得受讓非常抵玩。