惡客修咸頓 專恰西布朗

猪拉多纳

養精蓄銳搶分撐領隊

今輪英超壓軸戲碼喺山楂球場上演，由西布朗主場迎戰修咸頓。「聖人」修咸頓目前喺聯賽贏得1場兼作客全敗，出戰西布朗表面睇好似輸硬，但原來雙方近10次對壘各贏2場，其餘6場打和，以「聖人」8成不敗率兼球員力撐領隊嘅鬥心，卡爾萬相信佢哋受讓半一個下盤有望開出。

（有線200及300、廣東體育周二凌晨4:00直播）

「燈籠褲」西布朗今季可以話係正宗嘅地頭蟲，至今4場勝仗全部喺主場取得，任你邊隊作客嚟到都咪話唔驚。不過有樣嘢值得大家留意，佢哋喺頭3場主場對手一球不失，但最近2場就一共失咗4球，包括對住曼城喺大部分時間打多個兼領先1球下，尾段連失2球輸波，證明狀態有所回落嘅佢哋，已經唔係牢不可破。
西布朗近況回落人腳唔齊

雖然西布朗隊長布拉特、沙恩朗同耶高比有望傷愈復出，但領隊奇勒話明佢哋上陣機會只係一半半，換句話講即係未能以最強陣容迎戰。相反修咸頓就傳嚟好消息，佢哋今季重金收購嘅進攻中場加斯頓拉美利斯克服傷患兼且操番fit，缺陣接近1個月後宣布強勢復出，配合埋拉爾拉拿及列基林拔等主力悉數上陣，陣容比西布朗完整得多。

喺聯賽贏得1場兼作客4戰全敗嘅修咸頓，可能終於知衰，喺英聯盃作客列斯聯將全部正選收起，甚至連後備都冇份，最終畀列斯聯炒3蛋出局根本就如佢哋所願。除咗成班主力養精蓄銳備戰今場之外，隊長拉爾拉拿賽前受訪亦公開力撐領隊艾堅斯，表明全隊會竭盡所能為佢扭轉劣勢，更話自己効力修咸頓入嘅第1球波就係對西布朗，想好夢重溫咁話，卡爾萬信佢哋今場作客可以第1次有分落袋。
近10次交手6次打和

‧雙方近10次對壘各贏2場，其餘6場打和。

‧西布朗近6次主場對修咸頓取得2勝4和。

‧修咸頓今季聯賽作客4戰全敗，平均每場失4球。
和波波膽刀仔鋸大樹

西布朗同修咸頓上年喺熱身賽碰過頭，最後以2:2打和，連埋呢場計最近10次對壘就有多達6場和波，「0:0」、「1:1」、「2:2」各自開出2次，今場一於玩埋「和波波膽全餐」，刀仔鋸大樹。