車仔復仇降魔

猪拉多纳

聯賽盃再爆「紅藍大戰」！車路士同曼聯喺周日場聯賽搞到滿城風雨，呢對仇家今晚喺史丹福橋球場再遇合演聯賽盃第4圈賽事，唔使講焦點當然落喺球證會唔會再有「奇怪嘢」發生，領隊費格遜賽前亦出晒口術。上場「慘輸」嘅車仔今晚當然矢志報仇，既然紅魔要留力周末英超惡鬥阿仙奴，主隊值得睇高一線，捧2.1倍主勝！

（開賽時間：周四凌晨3:45）

雖然話上場亂咁吹嘅球證卡頓保因涉及不當言論，依家搞到一身蟻，但唔好以為今場嘅判官李美臣一定唔會搞搞震呀，費Sir賽前被問到有乜同佢講，呢隻老狐狸居然話：「祝球證好運啦！」嘩！小妹聽完真係打個突，咁樣明目張膽恐嚇球證都得，仲有王法嘅！即係話車路士想晉級，真係要自求多福喇！
費Sir出口術祝球證「好運」

不過講真，聯賽盃呢個盃仔對於車曼雙雄只係雞肋，連中港澳都冇電視台肯直播呢場波，就知大家幾睇低呢個盃仔。尤其曼聯周末英超要迎戰阿仙奴，今場留力事在必行，正選冇貨派嘅查維亞靴南迪斯、韋碧克同埋老將傑斯等大有機會落場，查實紅魔上場雖然早早領先，但被追和後，喺車仔踢少兩件前都冇拎到乜甜頭，實在難以予人信心。
紅魔留力周末鬥廠仔

反觀車路士周末只係作客走勢平平嘅史雲斯，仍然可以畀部分正選上陣。況且佢哋肯定想喺自己地頭贏番場出氣，幫車仔官網寫開Blog嘅桑馬達都喺最新網誌度話：「周中場聯賽盃我哋一定會贏番轉頭！」桑馬達一個禮拜踢足幾場都唔係第一次，而死火嘅費托停賽對車仔嘅火力隨時「因禍得福」，域陀摩西斯、史杜列治都係有數胡能力嘅猛將，小妹就睇好佢哋憑鬥志「擊敗球證」贏波喇！
車曼交手開5連大

‧車路士及曼聯近5次對賽全部開大，其中3場開出半場大。

‧車路士近10場主場賽事中，有7場開大。

‧曼聯作客5連勝兼全開入球大。
谷埋一肚火埋牙「大」激鬥

曼聯及車路士暫時分別以24球及21球，位列今季英超入球榜首次席，而且兩軍無論係對戰往績及近況，都相當有利開出入球大。況且雙方上場積怨後今場肯定埋牙肉搏，當然要捧1.62倍大啦！