皇馬焗用二線兵捱「細」界

猪拉多纳

今晚西盃第4圈首回合連場好戲，壓軸有皇家馬德里出場，作客面對丙組仔艾高恩奴，賽前爆出教練莫連奴成日對B隊球員亂點鴛鴦，搞到青訓產品難以成材，但由於之後連場硬仗，預計莫帥焗住會用更多新仔，加上「艦隊」近年於西盃作客低組別球隊經常「觸礁」，唔好預期佢地會大炒對手，今仗大細中位數調至3.5球，一於捧細盤。

（now 632周四清晨5時直播）
莫帥被批亂點新丁

皇馬日前雖大破馬略卡，但主帥莫連奴又辣火頭，今次「寸王」批評B隊冇將年輕球員拿祖培養成左閘，搞到在艾比路亞、法比奧干查奧同馬些路傷晒的情況下冇人可用，焗住要用艾辛客串，遭B隊教練反駁因莫帥常把一眾新仔放在唔擅長的位置，導致佢地愈踢愈差，唔能夠於A隊立足。
丙組仔艾高恩奴當弗

姑勿論誰是誰非，「銀河艦隊」依家傷兵滿營，雖有傳指揮官沙比阿朗素可紮住上陣，但其防中拍檔基迪拉肯定冇份，除了周末聯賽對薩拉戈薩外，下周中歐聯仲要硬撼多蒙特，連場硬仗下，難得今仗只係對住艾高恩奴，莫帥讓更多主力休息亦無可厚非，預計莫拉達、拿祖、荷西卡利祖、艾 比奧爾、卡卡等後備會擔正。

不過，皇馬近年於西盃作客弱隊，經常大失水準，09年試過作客慘吞艾高干四蛋，一年後又遭梅西亞悶和0比0，今次殘陣作客近六仗全勝的丙組仔艾高恩奴，未必炒得起對手，大細中位數調至3.5球下，細盤仲有1.75倍咪嫌少喇。