巴塞冇中堅 後防穿「大」窿

猪拉多纳

今晚巴塞隆拿回歸西甲作客華歷簡奴，雖然小妹覺得「地上最強」要贏波唔成問題，弊在佢哋狀態太過飄忽，大勝定險勝真係講唔埋，好在雙方防線都係豆腐渣，加埋巴塞嘅超強火力，入波一定唔會少，入球中位數3.5照捧1.83倍大啦！

（now632台周日凌晨4:00直播）

對於巴塞，小妹依家可以肯定嘅係佢哋攻強守弱，尤其係連副選「中堅」馬斯真蘭奴都要停賽，碧基又未知出唔出得，遲啲分分鐘要美斯串演後防添呀！自從「孖P」中堅組合變成長期傷兵後，巴塞近8場雖贏足7場，但其實只得2場冇失過波，近3場仲勁失8球添，以佢哋嘅水準嚟講梗係唔合格啦，今場畀華歷簡奴打反擊失1、2球又有咩出奇？
華歷簡奴場均失3粒

好彩嘅係巴塞火力仍然係「地上最強」，自從韋拿好番後，教練維蘭路華就有更多選擇，西班牙《體育報》就提出「應否用韋拿取代阿歷斯山齊士」呢個疑問，小妹就覺得不妨畀多啲機會韋拿落場啦！佢今季上陣僅9次就入3球，仲要大部分都係後備落場，比10場僅入1球嘅山齊士高效率得多，而且「球王」美斯同佐迪艾巴齊齊踢到曉飛，難怪近5場至少都有2球進帳啦!

不過華歷簡奴條防線同巴塞半斤八両，近5戰居然喪失16球之多，場均失球超過3粒，對於就快做爸爸嘅美斯同埋佢班手足嚟講，同食自助餐冇乜分別，呢場入球騷開硬喇！