科隆凱沙硬碰大激鬥

猪拉多纳

今晚德乙有場好戲碼，由兩支上季德甲降班兵團對壘，科隆主場迎戰凱沙羅頓。科隆已走出季初低潮，頻頻贏波打起信心，射手安東尼烏查更係瘋狂入波。凱沙羅頓貴為不敗之師，亦唔會示弱，應會有一場大激鬥，阿King睇好開出入球大。

（周六凌晨零時開賽）

科隆開季後首六場聯賽，竟然只得二和四負，不過自上月尾贏波開齋後，信心已經返晒嚟，近四仗狂搶十分。事實上，呢班波人腳質素屬於德乙數一數二，之前因為「心理問題」失準，依家重拾正常水平，要急起直追，氣勢額外強勁，絕對唔可以再睇小佢哋。尤其係前鋒安東尼烏查腳風非常順，連續三場有波入，拍檔捷希亦屢有佳作，阿King對呢對組合爭取入波，充滿信心。

凱沙羅頓聯賽十戰入十八球，屬於三支攻力最強嘅球隊之一，兩位前鋒賓查古及艾迪素已合共貢獻咗十一個入球。賓查古更係「客場殺手」，六個入球有五球係作客射入，今仗好可能又有「士哥」。不過，凱軍防守麻麻，只有一場聯賽保持不失，更有利開大。
科特布斯走樣難啃1860

另一支前列球隊科特布斯狀態走下坡，已連續三場贏唔到，主場出擊亦讓唔起實力相當嘅1860慕尼黑，要「讓球客勝」。最後一關恩高斯達特主場對阿倫，雙方喺季初德國盃交過手，當時恩軍作客慘敗0比3，今次主場再遇冤家，勢必有仇報仇，應會主攻，再捧入球大。