紅軍安治「大」廝殺

猪拉多纳

「俄羅斯革命」席捲晏菲路！今晚歐霸盃A組有利物浦主場迎戰俄超豪門安治，客軍喺09年升班後即刻進行「重金革命」，用鈔票打造成績，今場作客利物浦肯定恃住火力強大同「紅軍」合演一場對攻大戰，證明自己係歐洲新勢力，一於捧1.88倍入球大！（有線61、201及廣東體育周五凌晨3:05直播）

安治喺2009年先至重返俄超，全靠身家達80億美元（約620億港元）嘅礦業大亨班主克里莫夫瘋狂揼水買人，除咗伊度奧，基斯杜化森巴、施哥夫同狄亞拉全部夠晒卡士，成功喺俄超掀起革命，最近仲造出13場不敗嘅驕人成績，銳意挑戰辛尼特等超級豪門喺俄超嘅統治地位！佢哋上次踢歐洲賽已經係2002年嘅歐洲足協盃，今次捲土重來，當然要證明自己有能力喺歐洲立足啦！
伊度奧弗爆17戰入13球

提起安治呢隊波，相信大家第一個諗起嘅都係「全球最高薪球員」伊度奧，呢位周薪達35萬鎊（約433萬港元）嘅前鋒肯定會成為利物浦今場嘅最大威脅！佢今季上陣17次已經喪入13球，拍住拉辛拿查奧爾呢位好拍檔攻堅，「紅軍」條後備防線真係未必頂得住，唔係仲想旨意老態畢露嘅加歷查搞掂伊度奧啩？

「紅軍」嚟緊周日要應付默西賽德郡打吡，領隊羅渣士今場就算對住強敵都焗住要留力，面對勢如破竹嘅安治，真係未必有把握贏波。好在預計佢哋有喺分組賽入3球嘅舒維爾同埋交出3次助攻嘅達寧壓陣，再加上把握力強嘅紐尼沙軒都會披甲，恃住主場之利同安治鬥攻隨時仲划算，一於捧入球大坐定定睇入球騷啦！

歐霸盃A組
紅軍防線曳寧撐「讓客」

雖然話紅軍未試過喺主場嘅歐洲賽連輸兩場，但佢哋今季喺主場的確冇乜保證，而且要留力對愛華頓場打吡戰又只可以出副選，防線要靠高亞迪斯、積克羅賓遜等「90後」應付伊度奧領銜嘅鋒線，實在冇乜把握可以搶分，1.68倍「讓客」撐得過。
A組火力勁平均每場入4球

‧歐霸盃A組經過第2輪賽事後，錄得組別最高入球數字（17球），平均每場賽事出現超過4個入球。

‧利物浦從未試過喺主場歐洲賽錄得連敗。

‧利物浦如果喺今場再入1球，就會入到佢哋喺歐洲賽事嘅第550球。