馬體會10連勝追擊科大

猪拉多纳

今晚賽事以歐霸盃為主，阿King最近對馬德里體育會特別留意，呢支西甲二哥喺歐霸B組分組賽第三輪主場迎戰科英布拉大學，以該隊十連勝嘅氣勢，就算唔出首席射手法卡奧，要贏科大都係易如反掌，「讓球主勝」捧得過。

（有線63及203台周五凌晨3時05分直播）

自上季季中由前阿根廷茅柴施蒙尼接手後，以往「軟腳蟹」嘅馬體會變得硬淨好多，最重要係施帥喺限米煮限飯下，都能煮出上乘嘅菜餚，雖然失去中場核心迪亞高，但幾名回收或免費來投嘅球員魯爾加西亞、迪亞高哥斯達、基斯甸洛迪古斯及安利等，在施帥麾下妙手回春，而佢堅持輪換政策，上述四人更係歐霸主力，令球隊兩線作戰都表現得游刃有餘。
迪尼普「大」起拿玻里

相反科大唔係太適應一周雙賽嘅壓力，加上實力未夠班，喺歐霸兩戰得一分之餘，開季六場葡超僅得一勝，相信該隊喺歐洲賽都係有心無力。預計馬體會唔會派出腳風甚順嘅法卡奧，但有歐霸殺手基斯甸洛迪古斯在陣，依然綽綽有餘，「讓球主勝」熱透值博。至於F組迪尼普目前手執六分，乘主場九連勝勇態唔會同拿玻里玩守勢波，大盤有計。同組燕豪芬主強客弱，必趁主場之利喪攻AIK蘇納搶分，入球大咪錯過。