布力般錫周三做大騷

猪拉多纳

今晚英冠獨腳戲布力般流浪主場迎戰錫周三，論近況兩隊波可謂同病相憐，雙方嘅前鋒都喺上場破入球荒，今晚海軍鬥水兵勝負難料，但可以肯定嘅係兩隊都希望搵對方嚟止血兼反底，既然戰意甚濃，一於博1.68倍入球大！ （開賽時間：周四凌晨2:45直播）
兩軍前鋒回勇

布力般流浪自從9月尾前主帥堅恩「被辭職」後已經連續5場不勝，由最初嘅榜首位置跌到落第10位，佢哋嘅領隊亨特利前日仲捲入當地一單傷人案畀警方拘捕，好彩最後冇被起訴，否則軍心一定仲亂！至於佢哋今晚能否爭勝，就要睇佐敦洛迪斯嘅表現，呢名前鋒4輪聯賽食白果後上場再度入波，係布力般止血嘅關鍵人物。

錫周三嘅情況就仲衰！佢地近9場都未贏過，門將卻克蘭喺上場又無喇喇畀列斯聯球迷襲擊，認真黑過墨斗！唯一值得安慰嘅係，今季未入過波嘅前鋒保夫萊特終於喺上場開齋，錫周三今晚食粥食飯都旨意晒佢。睇番數據兩隊幾乎每場都有失波，既然撞啱雙方前鋒一齊回勇，今晚1.68倍入球大穩陣之選！