落後一粒焗攻鹿角

猪拉多纳

日本聯賽盃四強戰次回合衞冕球隊鹿島鹿角作客柏雷素爾，首回合鹿角贏3比2，佢哋喺天皇盃正選陣容收起主力「雙查」，擺明車馬留番今場同柏軍死過。兩軍傾力爭奪決賽席位，預期會合演另一場入球騷，要大盤！（周六晚6時開賽、馬會網上文字直播）
心跳反擊東京

鹿角今季聯賽冇乜行，疊埋心水喺盃賽發展，啱啱喺天皇盃踢到加時先淘汰日乙弱旅鳥取飛翔，發揮麻麻，主要因為唔齊腳，佢哋正選陣容唔見弗爆外援沙治奧杜查，換邊後先搵佢落場搏殺，另一主力連拿度卡查直頭冇踢，留起星級「雙查」，明顯係為今場關鍵大戰部署。

柏雷素爾續有王牌中場李安度杜明基斯受傷休戰，死球威脅力稍打折扣，但另一星級外援佐治韋拿處理死球都ＯＫ，大軍中前場人腳充裕，火力仍強。柏軍首回合輸緊一粒，今次返主場實會搏晒命反撲，但佢哋條防線唔穩陣，谷前搶攻隨時輸反擊，今戰入波唔會少。

同日清水心跳主場對ＦＣ東京，心跳首回合輸1比2，回師主場全力反擊，東京門神權田修一及中後場重心高橋秀人入選國家隊缺陣，戰鬥力受削，加上上場對鹿角大敗士氣受損，受讓都信唔過，捧心跳！