科隆回勇弗爆登

猪拉多纳

今晚得四場波唔怕花多眼亂，阿King對德乙球隊科隆情有獨鍾，該隊近期已重上正軌，於主場對住實力一般嘅特雷斯登，主勝實食冇黐牙值得捧場。

（周二凌晨2時15分開賽）

科隆今季降落乙組又出閘脫腳，頭四仗未贏過，好彩經過主帥史坦拿域斯基悉心調教後，近兩仗取得連勝，其中基斯甸基文斯同史祖比於中場攻守兼備，加上兩場後備入替為球隊奠勝嘅捷希腳風極順，今仗大有機會入多幾粒，一於吼科隆贏波豪取三連捷。

至於挪超球隊白蘭恩今季特性明顯，就係主強客弱，齋計主場白軍已連贏九場，前線主力甘奧祖、拜特芬尼輪流發威，反觀對手漢福斯近八作客僅贏一場，難敵火力特猛嘅地頭蟲，「讓球主勝」有計。最後葡超球隊摩里倫斯主場對馬里迪莫，主隊連輸三場，見到都唔開胃，但馬里迪莫近五仗入得兩粒咁大把，加上剛於歐霸作客出戰，兵疲之下有心無力，呢場唔慌多波入，細盤值博。