德島漩渦打老「府」

猪拉多纳

打風帶挈叉足電搏殺

日乙榜首球隊甲府風林今日喺主場迎戰下游球隊德島漩渦，表面睇「依絲執」，實情甲府已經帶開次席嘅湘南比馬11分，冠軍在望使乜同你搏？再講，德島因為颱風關係上星期唔使踢，叉滿電又多時間備戰，有機會趁對手戰意鬆懈開2.1倍「讓球客勝」！（開賽時間：周日下午1:00）
甲府風林留力打榜首戰

上季甲府喺日職得第16名降班，中鋒夏雲拿去埋荷蘭搵食，但佢哋高層做到嘢，搵到曾經帶領FC東京奪得日聯盃冠軍嘅城福浩做新教頭，帶挈由中東回流日本嘅達維強勢翻生，現時甲府喺聯賽連續18場不敗有13勝5和，達維上場梅開二度後以28球領先射手榜，只要贏多兩場，更加可以提早宣布升班，咁嘅勢頭，原本真係唔應該同佢哋作對。

不過咁，甲府隨後嘅對手正正係聯賽次席球隊湘南比馬，為免榜首大戰有差池，呢場難免會有避忌，而且甲府榜首優勢有11分，正常都會戰意鬆懈，好難話有必勝把握。另一方面，德島今季戰績遠低於外界預期，首席射手津田智宏最近又傷埋，但唔好忘記，上星期德島對京都不死鳥因為打風延期，球員抖夠又餓波，冇降班壓力話唔埋會有超水準發揮，受讓撐得過。