黑雙煞射爆紅魔

猪拉多纳

曼聯今季買入尹佩斯、香川真司等球星，誓要重奪英超冠軍寶座。不過佢哋季初表現完全欠缺說服力，中場創造力不足、後防甩漏多，上星期輸畀熱刺唔令人意外。今晚紅魔作客紐卡素又係硬仗，「喜鵲」前線黑雙煞丹巴巴亞同柏比斯施斯近期打番起狀態，有力射爆紅魔鬼條脆弱防線，2倍「讓球主勝」實在非常抵玩。（有線200及300、廣東體育周日晚11:00直播）
防線傷兵多續用毒瘤艾拉

紅魔喺聯賽已經輸咗兩場，上仗主場都畀熱刺嘅高速鋒線打殘。事實上，即使佢哋贏波，表現一樣都係拖泥帶水，上周中歐聯對住名不經傳嘅克盧日都要先失波，最後反勝只係靠有出色表現嘅尹佩斯。左閘艾拉已經成為曼聯防線毒瘤，對克盧日又係佢嘅失誤搞到失波，據報費格遜鬧到佢一面屁，但衰在尼曼查維迪、菲爾鍾斯同基斯史摩寧都受傷，費Sir嘅選擇真係唔多囉。

紐卡素開季表現雖然唔多好，不過丹巴巴亞、柏比斯施斯同賓艾化嘅鐵三角依然好有威力，上季後半階段踢到無影嘅丹巴巴亞，近3場聯賽狂入5球，完全重現佢本身嘅威力，佢同柏比斯施斯呢個黑雙煞組合踢法刁鑽，以曼聯條防線真係好難睇得佢哋住。何況紐卡素主場向來夠惡，今場要有分落袋唔係咩高難度嘅事。

頂占筍盤：紐卡素（讓球主勝）
喜鵲對賽旺開大

‧紐卡素近6次主場鬥紅魔鬼受讓1球，有3次贏盤。

‧喜鵲近５次主場作賽未輸過。

‧兩隊近10次對賽有7次開大。