PSG搏殘讓唔起馬賽

猪拉多纳

今周法甲壓軸戰上演國家打吡，馬賽主場迎戰巴黎聖日耳門（PSG），馬賽上輪雖被華倫西恩斯打破今季聯賽不敗身，不過上周中歐霸盃大勝一場已極速反彈，相反聖日耳門剛戰不敵波圖，一眾主力伊巴謙莫域、利尼疲態畢露，試問作客點讓宿敵馬賽平半，下盤超筍不容錯過。（周一凌晨3時開賽）

馬賽對巴黎聖日耳門呢個戲碼，地位等同西甲巴塞對皇馬、或者英超曼聯對利物浦，牙骹味一向甚濃，更何況以暫時表現嚟睇，今季聯賽錦標好大機會係兩者之爭，令到今次勝負比起過去幾次更為重要。
歐霸大勝 馬賽返晒嚟

馬賽上周末聯賽雖然大敗，不過之前六場全勝戰績冇花冇假，而且歐霸盃大勝已經證明對球員士氣冇影響。值得一提係加盟後首次上陣嘅巴西後衞盧卡斯文迪斯對AEL利馬素時射入一球並交出一次助攻，演出大受好評，隨時再成贏波奇兵。

聖日耳門聯賽7戰未輸過，連歐聯在內更一度造出5連勝佳績，不過佢哋上場歐聯作客波圖輸0比1，連勝走勢斷纜，最慘係主力伊巴謙莫域、利尼及後備上陣嘅柏斯托尼都冇晒火，中場拿維斯後備落場踢咗幾分鐘又傷埋，今仗肯定倦勤，狀態、信心拍埋馬賽度可謂此消彼長，以目前情況嚟睇，馬賽主場出擊甚至有權讓番對手轉頭，如今受讓平半實在好抵玩！