唱黑打紅捧喜鵲

猪拉多纳

曼聯「斯朗組合」尹佩斯同朗尼喺歐聯擦出火花，今晚返聯賽作客紐卡素繼續拍住上，火力有保證！不過，「紅魔鬼」今季喺英超表現慢熱，6戰有5場先失波，後防不穩，今戰續有隊長尼曼查維迪受傷缺陣，頂唔住「喜鵲」前線黑雙煞丹巴巴亞同柏比斯施斯，紐卡素可保今季主場不敗金身，捧「讓球主勝」！（有線300及200台周日晚11時直播）
斯朗組合真正考驗

「斯朗組合」被視為英超最強前鋒組合，曼聯球迷等到頸都長，終於見到佢哋齊齊嚟料，朗尼剛過去周中喺歐聯作客克盧日一戰兩度助攻畀尹佩斯建功，證明兩大球星可以並存。不過，嗰場對手只係羅馬尼亞二流球隊，所以唔使咁快捧到「斯朗」上天，作客鬥紐卡素至係佢哋嘅真正考驗。單計前線人腳，「紅魔鬼」確係英超最強，連查維亞靴南迪斯同韋碧克都要坐冷板，教頭費格遜唔使愁冇人用。

不過，曼聯今季踢英超唔多順，除咗主場大勝韋根一役由頭贏到尾，其餘5戰都要先失波，面對富咸同修咸頓都發揮後勁反勝，作客利物浦就有球證幫手憑12碼反先，但另外兩場遇上實力分子愛華頓同熱刺就一輸到尾，今場有乜閃失睇嚟又會幾難追。「紅魔鬼」衰在防線中路傷兵多，菲爾鍾斯同尼曼查維迪養傷多時，里奧費迪南逐漸老退跑唔郁，經常被對手放甩，莊尼伊雲斯亦係靠唔住，雖然話基斯史摩寧有望復出，但久疏戰陣，狀態肯定成疑，因此紅魔防線點睇都係危機四伏。
近況往績絕不輸蝕

紐卡素後防亦唔齊腳，正選門將告魯爾及中堅高洛仙尼要養傷，但防中迪奧迪已經復出，可以喺4個後衞前面協助掃蕩，防禦力稍增。不過，「喜鵲」前線有塞內加爾黑雙煞柏比斯施斯同丹巴巴亞助陣，兩人夾慣夾熟，前者已打破入球荒，信心返咗嚟，後少少又有左腳王賓艾化幫手，呢個攻擊鐵三角堅有料到。紐卡素今季主場5戰4勝1和，近兩次主場對曼聯亦錄得1勝1和，計往績一啲都唔輸蝕，主場有得受讓實在抵玩。