利物浦至叻驅「魔」

猪拉多纳

今個星期嘅英超，似乎將啲好戲集中晒喺今晚，「曼」市雙雄、利物浦同阿仙奴，紐卡素同熱刺幾隊有份踢歐洲賽嘅都喺今晚出擊。其中重頭戲就係衞冕嘅曼城撼阿仙奴，同埋早場嘅曼聯火併利物浦。「雙紅會」爆發，小弟今晚要擦「海鮮」捧利物浦，捧4.9倍「讓球主勝」！

（有線200及300周日晚8:30直播）
近4年主場對賽3勝1和

紅軍今季開咧4場只得2和2負，雖然話創會101年以來，都未試過開局咁差，但班「利迷」近年對類似嘅窘境都司空見慣。賭仔金句：「若要生活好，咪買利物浦」或者都有其道理，不過今場就唔啱用啦！事關利物浦無論喺聯賽踢到幾衰都好，每次一遇到世仇曼聯，就例必踢高兩皮波，近4年主場對賽有3勝1和未輸過，所以呢個架點都唔可以丟！

講到唔衰得，利物浦自從成功平反「希爾斯堡慘劇」後，今場係首次喺晏菲路主場亮相，氣氛肯定相當激昂。球員方面，舊年被曼聯控告種族歧視嘅蘇亞雷斯，更加要喺紅魔迷前出番啖氣，有佢同新星史達寧一齊衝擊曼聯防線，紅軍都唔係冇還手之力o架！
畢拿替艾拉隨時怯場

另邊廂嘅曼聯近期喺英超3連勝，但防線不穩始終係計時炸彈，尤其係喺菲爾鍾斯同基斯史摩寧長抖之下，可供費Sir選擇替補嘅人始終唔多，右閘拉菲爾達施華重攻輕守，左閘艾拉就明顯嚴重退化，今仗盛傳會由新仔阿歷山大畢拿頂替，但呢位荷蘭新兵始終大賽經驗淺，又怕佢會臨時怯場大失水準。

最慘係朗尼證實趕唔切傷愈復出，令入波重責過分集中喺尹佩斯身上，而拿尼同查維亞靴南迪斯近兩場分別12碼宴客，信心始終有啲影響，況且作客又真係無咩甜頭。呢個時候，又係「海鮮」利物浦發威喇！
維迪遇利物浦 多做紅牌阿姑

‧尼曼查維迪喺英超4度領紅，有3次係面對利物浦。

‧利物浦最近5次主場鬥曼聯錄4勝1和。

‧自2011年3月起，只要曼聯喺英超作客有波入都未輸過。
頂占筍盤：利物浦（讓球主勝）

有線球彩台主持阿占

電郵：soccer64@cabletv.com.hk

面書球彩專頁：http://fb.com/icable64

PHONE波熱線：1831 678

「快樂星期天」開放時間：周日晚9:00至周一凌晨1:30