富明尼斯拆紐保一哥

猪拉多纳

大家周日早上睇完西甲巴塞隆拿對ＣＦ格蘭納達後，唔好咁快就熄電視去飲早茶，因為仲有一場直播波，就係巴甲「一哥」富明尼斯主場對紐迪高。兩軍都有唔少球迷耳熟能詳的球星，大家可以乘機看看他們回到巴甲後球技和身形有冇走樣。富明尼斯雖貴為一哥，但只領先次席明尼路兩分而多踢一場，今場有閃失隨時被後者趕上，遇上作客腳軟的紐迪高相信唔會放過對手，一於捧富明尼斯「讓球主勝」。

（now 633周日清晨５時30分直播）

富明尼斯陣中最大名氣球員相信係前葡萄牙國腳迪高，但此子自今年8月後因左大腿受傷未有再為球隊出賽。今仗賽前傳來消息，迪高已傷愈可復出，相信有助穩定軍心及令球隊士氣提升。

除迪高外，射手費特及拿費爾蘇比斯與門將迪亞高卡華利尼都曾在歐洲頂級聯賽打滾，其中費特現時射入11球於巴甲射手榜與聖保羅的路爾斯法比安奴一同領先，今仗勢必搏盡爭取入球。富明尼斯上仗主場不敵包尾大幡戈亞尼恩斯，爭標形勢變得被動，今仗續於主場出擊相信唔會再大意。
紐迪高作客腳軟

作客的紐迪高陣中名氣最響的是前日職大阪飛腳的35歲射手阿羅約，此子今季以外借身份由富明尼斯加盟已射入7球，表現寶刀未老。不過，紐迪高客場成績認真不敢恭維，近9場作客賽事輸了7場，而且只入3球，今仗造訪「一哥」富明尼斯相信難爆冷，捧富明尼斯主場炒番場鞏固榜首位置。