太阳报 愛華頓撲熄史雲斯「虛火」

sherry

愛華頓撲熄史雲斯「虛火」
2012/09/22文:卡爾萬

史雲斯英超開咧頭3場2勝1和入咗10粒，表現真係令人眼前一亮，不過隨住佢哋上場作客輸畀維拉後，相信虛火已過。況且佢哋條後防線繼尼爾泰萊提早打柴，隊長艾殊利威廉斯表現亦受質疑，卡爾萬睇好愛華頓今場坐和望贏，平手盤撐「拖肥糖」。


史雲斯早兩場對新特蘭雖然兩度扳平攞番1分，但後衞尼爾泰萊就腳踝受傷提早打柴，啱啱對維拉嗰場隊長艾殊利威廉斯仲跣咗球靚波「助攻」畀對手，累隊波全失3分之餘，賽後仲畀傳媒怒插。就算領隊米高盧特立企出嚟幫隊長講好說話：「大家都話威廉斯從來唔會犯錯，但我可以肯定咁話每個人喺某啲時候總會犯錯。」但卡爾萬覺得依家你哋人又少咁件，球員信心又受動搖，唔係話你講一句就搞得掂喎！

相反愛華頓雖然都有前鋒謝拉域要養傷2個星期，今場要由米拿拉斯頂佢個位，攻擊力睇落好似弱咗啲，之不過班波目前6個聯賽入波分別由5個球員取得，入球點夠晒分散，令人防不勝防。防線咁唔穩陣嘅史雲斯，今場隨時畀愛華頓玩到陀陀擰，平手盤一於捧客軍。