大將冇心踢 防線跌Watt 蒙彼利埃回「天」乏力

猪拉多纳

今晚法甲獨腳戲由蒙彼利埃主場迎戰聖伊天，衞冕嘅蒙彼利埃開季演出完全冇上季嘅鬥志同信心，周中歐聯處子戰輸畀阿仙奴更令士氣大受打擊，加上後防大將恩加麥比華又無心戀戰，小妹都係敲1.72倍「客勝」博聖伊天不敗喇！（開賽時間：周六凌晨2:45）
聖伊天火力有保證

蒙彼利埃今季出現典型嘅「奪冠後遺症」，開季得1勝1和4負仲場場有失波，防守同上季嘅法甲最強防線相比真係差天共地！當中恩加麥比華絕對責無旁貸，呢位中堅自從喺今夏跳槽AC米蘭唔成後，唔知係咪諗住出年夏天約滿可以走人，成日好似心不在焉夢遊球場咁，再交出咁嘅表現，小妹真係擔心佢到時走得都冇人要！

家陣蒙彼利埃成隊波淨係靠貝漢達同埋雷米卡比拿撐住，士氣相當低沉，相信主場出擊都冇十足把握贏波。雖然聖伊天亦唔算好景，開季到依家5場波2勝3負，好在佢哋有奧巴美揚、古拿禾古同夏蒙馬壓陣，火力有保證，有力撕破蒙彼利埃條跌Watt防線，作客有力搶分而回。

猪拉多纳