熱刺後防多甩漏 拉素起刺

猪拉多纳

啱啱喺英超開齋嘅熱刺，主帥保亞斯話明今晚歐霸盃J組主場迎擊意甲球隊拉素，必會全力出擊咁話。不過咪話力奇潑冷水，保帥一向得把口冇料到，最慘係佢班波後防亂七八糟，今仗仲話會派新兵洛里斯把守大門，默契輸晒，隨時前面入埋唔夠輸，仲點贏波？熱刺讓波，必捧2.05倍「讓客」。

（有線64及204、廣東體育周五凌晨3:05直播）

熱刺踢到英超第4輪先打開勝利之門，保亞斯係咪真正有料，睇怕都唔使力奇多講。話就話今仗乘勝追擊，保帥仲保證會用強陣去踢，但睇番熱刺近況，4戰得1勝2和1負，共入6球失5球，後防場場有失波，根本完全信唔過。最慘係佢哋位正選左閘伊高圖今晚因傷繼續缺陣，上仗頂佢個位嘅基爾洛頓經驗不足，踢歐戰隨時出事。此外，新兵法國門將洛里斯唔係話冇料，只係佢加盟冇耐，同隊友培養默契需時，今晚搵佢打正選，又係等於擺個計時炸彈喺自己門口，睇佢幾時爆囉！
拉素易帥脫胎換骨

拉素今夏搵咗寂寂無聞嘅波斯尼亞教練柏高域接手，正當大家以為呢位49歲主帥冇乜料到，以前最叻只係喺瑞士同土耳其球會任教，點知拉素喺佢手中，開咧竟然打出5戰全勝佳績，氣勢勁爆。

事實上，柏高域領軍方式崇尚進攻，結果巴西兵靴蘭尼斯喺佢麾下今季大翻身，更加得到重用同位置推前去進攻中場後，拉素火力即時大幅提升。其中靴蘭尼斯本人至今4戰入4球，射手高路斯又有3個「士哥」，拉素近3場波每仗都入3粒，真係唔講得笑，對住熱刺根本冇嘢好驚。

值得一提，20年前熱刺將名將加斯居尼賣畀拉素，呢個「肥仔嘜」天才結果喺意甲踢出精彩一頁，今晚據聞熱刺都邀請佢入場睇波，唔知佢到時會為邊隊打氣呢？

歐霸盃J組