紅魔噬聖人 曼聯射爆冇料修咸頓

猪拉多纳

「聖人」都有錯，更何況「紅魔」？曼聯由英超首戰不敵愛華頓，到上星期反勝富咸，表現愈嚟愈好，朗尼傷咗，費Sir焗住「知錯」，排番4411陣式，今晚佢哋造訪新季3戰失6球嘅修咸頓，係時候贏鋪勁o架喇，捧2.22倍「讓球客勝」啦！

（有線200及300、廣東體育周日晚11:00直播）

小妹仲記得《那些年》入面嘅對白：「我想成為一個很厲害的人，令世界因為我而有一點點的不同」，年少無知嗰陣講完就算，依家小妹投身社會，呢個宏願直頭連諗都唔敢諗！

好彩唔係個個都好似小妹咁，16歲嗰陣，大家做緊乜？依家有班少年，佢哋唔係想做「厲害的人」，只係想保護其他人，可惜好多大人、受益者不但袖手旁觀，而且更落井下石，舞台劇大師搵好多錢、有豐富學識又點？一樣可以短視無知。雖謂人生如戲，但唔係每件事每個人都係做緊騷。小妹衷心祝願呢班小朋友成功。
踢番4411防線更穩

講番波，為咗遷就新加盟嘅香川仔同尹佩斯，費格遜新季幫曼聯排咗個4312新陣式，不過新鋒線磨合需時，而且中間少咗件工兵，防守點都爭啲，家陣朗尼打柴反而仲好，正正路路用番尹佩斯拍香川攻堅，中場搵番路爾斯安達臣拍湯卡華利掃蕩，攻守平衡啲，條防線就唔會好似頭兩仗咁穿晒窿啦！

講真，小妹喺開鑼日見到修咸頓用反擊戰術，幾乎玩死曼城，嗰個Moment確係有少少鍾意咗「聖人」，不過上星期佢哋返主場對韋根，竟然照辦煮碗踢穩守突擊，嘩，韋根出名守o架喇喎，結果修咸頓下半場忍唔住攻，最終咪輸0:2囉。「聖人」錯就梗o架喇，到早幾日簽埋日本中堅吉田麻也，就更加覺得佢哋唔知錯囉！修咸頓最缺乏嘅其實係中場，轉守為攻嗰下冇人派牌，就算塞晒3中堅喺度，下下高Q大棍反擊，你估踢英冠咩？今晚面對如狼似虎嘅「紅魔」，輸少當贏啦！
10次對賽曼聯贏9鋪

‧兩軍近10次對賽，曼聯豪取9勝1負。

‧曼聯近10場作客，只曾1次半場開大。

‧修咸頓近10次主場，有7次半場開細。
微博傳情：泰國男仔識普通話

上星期泰國之行，小妹日日游水潛水，同陽光與海灘玩遊戲，仲有一次係玩埋浮潛餵魚添！有相有真相o架！唔單止咁，可能小妹做埋Spa人都靚啲啦，喺泰國期間，有日同個Best Friend行行吓街，竟然有個泰國男仔用普通話向我搭訕，小妹當然冇理佢啦，不過我要強調一點，係小妹個Best Friend都好靚女吓o架，哈！