巴勒莫悲情長反啱素

猪拉多纳

本輪意甲Ali首選場次係拉素主場對巴勒莫，巴勒莫正處於球會最惡劣時刻，現階段人見人欺，作客遇上已重返正軌嘅拉素難逃一敗，拉素主Ｗ係Ali出擊重心，嫌1.6倍賠率奀的話，2.72倍「讓球主勝」一樣係信心之選。

（周一凌晨2時45分開賽）

巴勒莫首輪主場以0:3不敵拿玻里，Ali賽前已經話咗佢哋季前備戰工夫差，但估唔到竟然踢到好似業餘球隊咁，如果唔係有運，拿玻里隨時數多三、四球。巴勒莫防線喺上季已經唔穩陣，今季冇埋馬迪亞斯施維斯達同巴沙列堤就更加任人魚肉，而且連進攻都冇料到，主場出擊下竟然連一次似樣嘅攻門都組織唔到，場波簡直係悲劇。

巴勒莫教練桑尼路準備喺今仗改採守勢，但陣容不整，中前場比恩沙同艾蘭沙維缺陣，守將文度雲尼、錫圖同進攻中場伊利錫亦上陣成疑。球隊上季已經係意甲其中一支作客最差球隊，季初就試過連續八場冇波入，目前形勢更差，喺Ali眼中直情係降班膽添！
拉素有力挑戰前三

回顧首輪賽事，Ali推介巴勒莫同羅馬兩場大盤都中，只係阿特蘭大對拉素貼和波唔中，拉素上場作客去到Ali出生地貝加莫（Begamo），表現比預期更出色，結果小勝阿特蘭大1:0，新帥柏高域對原有陣式未作任何改動。其實拉素本身就有級數，只係上季長期受傷兵問題困擾，如今陣容復整，保持水準今季有機會挑戰前三名。

拉素上周中歐霸盃主場對弱旅梅拿，出半力都輕鬆過關，球隊進攻線擁有莫利、靴蘭尼斯同高路斯等質態均佳嘅攻擊手，今晚贏面高唱入雲。
Ali 推介：

拉素讓球勝 ★★★★

祖雲達斯勝 ★★★

卡坦尼亞勝 ★★★