阿仙奴剋爆紅軍

猪拉多纳

英超是日重頭戲由利物浦主場鬥阿仙奴，紅軍向來遇強愈強、遇弱愈弱，上周主場鬥勁旅曼城受讓差啲贏埋，但今場對手阿仙奴走埋尹佩斯，開咧後兩戰不勝零士哥，毫無強隊本色，個勢仲弱過紅軍，利物浦今次由受讓變讓波，實在非常牙煙，捧阿仙奴「讓球客勝」！

（有線300台及200台周日晚8時30分直播）
訪晏菲路5季不敗

利物浦改由新帥羅渣士領軍，但似乎仍未擺脫舊有海鮮波風格，上周主場惡戰曼城受讓踢到曉飛，如非傻仔中堅史卡迪爾尾段誤傳送禮畀泰維斯士哥，已經全取三分。紅軍剛過去周中歐霸盃主場對赫斯被捧成一面倒熱門，兩條煙謝拉特同蘇亞雷斯都有落場，一眾球星喺場上自動波留力，班波表現走晒樣，僅能逼和對手晉級，熱W就此泡湯，畀唔少菠菜人士狂插「禮義廉」。

利物浦喺主場有鋪打虎癮，上季主場對曼市雙雄、熱刺同紐卡素等前列球隊都保持不敗，只曾以1比2不敵阿仙奴，似乎唔當兵工廠係強隊。紅軍近五次聯賽主場對阿仙奴不勝，往績曳仲讓波，堅擇使！利物浦主要傷兵得中場盧卡斯，但有皇家馬德里借將紐尼沙軒頂上，教頭羅渣士踢地波放走埋高佬中鋒安祖卡路爾，前面靠晒蘇亞雷斯同波連尼，變招空間唔多。
辛迪卡索拉交到貨

阿仙奴放走王牌前鋒尹佩斯，前線確係少咗個士哥拿，新兵普多斯基同基奧特開咧頭兩場頻頻失機，令球隊錄得兩戰全和兼冇士哥劣績，確實好冇「飛士」。正面啲睇，兵工廠頭兩場仍然創造唔少入波機會，新中場指揮官辛迪卡索拉都好對辦，今次牌面睇落處下風，但實際上兩隊差距唔大，紅軍主場出戰谷前搶攻，更有利阿仙奴快速反擊，贏埋唔奇！