巴塞突襲艦隊

猪拉多纳

「沉淪艦隊」皇馬今晚喺西超盃次回合主場鬥巴塞，雖然會有「殺手防中」比比復出，仲話有「新發電機」莫迪歷隨時候命，不過考慮到佢哋近況低沉，家陣落後2:3仲要焗攻，以美斯為首嘅巴塞閃電戰隊大把機會搵食，足智彩開平手盤，一於捧1.9倍巴塞勝。（now632台周四凌晨4:30直播）

首回合巴塞雖然只係小勝1球，但論全場形勢，「地上最強」明顯係大佔上風嘅一方，再者，若非巴塞門神域陀華迪斯送禮，皇馬又點會追得番2:3，等今場仲有價講吖！不過咪話力奇潑「銀河艦隊」冷水，喺C朗仲未上力嘅情況下，奧斯爾又長期態沉，莫迪歷新加盟未夾熟班波，佢哋又邊有能力去反勝先？
比比腦震盪後首度登場

防線方面，比比復出雖然為皇馬喺中場加番道屏障，但佢腦震盪後首次落場，隨時患得患失，狀態同信心有幾多真係難講。左閘法比奧干查奧上場聯賽衰多口被逐，仲要睇吓球庭點判，隨時今日賽前先收通知要停賽，打亂晒部署，今晚仲要焗攻，點搞呀？

對家巴塞前日復操，布斯基斯、恩尼斯達、碧基雖然只係留喺健身房做運動，但據聞同傷病無關，只係畀佢哋輕鬆抖抖啫。中場新星堤亞高艾簡達拿自5月右腳小腿受傷後首度回歸大隊操練，當然能夠刺激軍心，不過今場未必會即時復出。
馬斯真蘭奴取代佩奧爾

雖然巴塞精神領袖兼防線重臣佩奧爾，因為顴骨骨裂今場好大機會掛免戰牌，但佢個位有阿根廷通天老倌馬斯真蘭奴頂上，防守同樣穩健。佢哋今仗仲會有中場核心沙維復任正選，有佢喺中場校炮，前線美斯、柏度洛迪古斯同法比仔肯定大把餐士。咪忘記件中場新兵桑治又操到火紅火綠，等住落場搏表現，大軍質素同狀態都好過皇馬，作客開平手盤，坐走望贏啦！

首回合：皇客負2:3
西超盃賽制

採主客兩回合制，今輪為次回合，若兩回合賽和，先計作客入球，若未分高下則加時30分鐘，再和則互射12碼決定冠軍誰屬。
國家打吡勁旺大

‧兩隊上季7次對賽全開入球大。

‧皇馬近6次主場對巴塞2和4負未贏過。

‧首回合兩軍半場和0:0，下半場先開入球騷。