小保加踢館搶W

猪拉多纳

明早上演多場美洲波，焦點一定係南美球會盃第二圈次回合「阿根廷內訌」，獨立隊主場對小保加。雙方首回合共炮製六個入球，打和三比三，實在精彩。不過對小保加而言，就唔多高興，皆因被對手取得三個作客入球，所以今仗必定豁出去求勝。獨立隊上次唔輸，有幸運成分，今場未必再咁好彩，阿King睇好客勝。（周四早上6時15分開賽）

小保加首回合曾三度領先，但都被逼和，主因係下半場初段已打少一人，仲喺補時被判罰十二碼，贏唔到的確唔抵。事實上，小保加走勢凌厲，近五仗取得四勝一和，每場最少入兩球，無論實力及狀態都喺獨立隊之上，只要正常發揮，作客都唔怕對手，難怪莊家開出小保加讓波，明顯對客軍較有信心。
「天大」主場惡可拔頭籌

至於獨立隊今季五場正式賽事都未贏過，其中四場冇波入，首回合入到小保加三球，可以話係「奇迹」，今仗好難再重演，估計捱打居多。再睇獨立隊過去三次主場對小保加，只得一和二負，毫無地利優勢，客勝2.3倍值博。

另一場南美球會盃，智利球隊天主教大學主場對哥倫比亞球隊杜利馬，屬於第二圈首回合賽事，「天大」必然趁有地利全力爭勝，否則次回合作客會好難踢，以佢哋近五次主場四勝一和走勢，可望先拔頭籌。

巴甲賽事，富明尼斯主場對哥連泰斯亦值得留意，富軍正全力爭標，頻頻奏捷。哥連泰斯位處中游，戰意成疑，近兩仗輸畀名牌球隊山度士及聖保羅，今仗遇上實力更強嘅富明尼斯，前景凶多吉少。