閃電炒起奧沙 巴塞2戰轟8粒着晒火

猪拉多纳

先炒皇蘇5:1，又喺西超盃力克皇馬，巴塞改由維蘭路華揸旗後鬼咁猛火，今晚造訪奧沙辛拿隨時再開殺戒，嫌1.45倍「讓客」冇肉食，不如吼2.1倍半場大，撐巴塞快快手手將場波擺入雪櫃。（now632台周一凌晨1:00直播）

西班牙《世界體育報》尋日分析咗「地上最強」新季有乜唔同，從首輪西甲同西超盃首回合所見，巴塞無論長傳同遠射次數都明顯比上季多咗，沙維、柏度洛迪古斯同碧基都頻頻遠射，上仗鬥皇馬嘅7次角球更加係全部斬入禁區，證明維蘭路華嘗試用更多進攻招數，唔似得哥迪奧拿時代咁死搓爛搓。
奧沙中場孖寶缺陣

進攻直接咗自然威脅都大咗，呢個亦係巴塞開季兩戰入8球嘅主因，加上韋拿長抖復出後搵番射門鞋，前線多番件猛將，簡直係如虎添翼。據《馬卡報》透露，法國後衞艾比度已經進行恢復性操練，雖然有排未出得，但新兵桑治就入咗作客大軍名單，有望處子登場。

主隊奧沙辛拿喺開鑼戰淨吞新升班嘅拉科魯尼亞兩蛋，仲要成場波都處於下風，淨係睇拉科射手里基軟弱無力嘅射門都收得死門將安達斯費南迪斯，就知奧沙幾流啦！雖然會方啱啱從史浩克借入加納中場安蘭，但兩位中場新兵蘭奴及艾文迪路斯都因傷缺陣，半場輸鑊勁有乜出奇呀？
巴塞近3季作客僅4敗

‧巴塞近10次對賽獲7勝1和2負。

‧近3季西甲聯賽，巴塞作客只曾錄得4場敗仗。

‧巴塞近7次贏奧沙辛拿，當中有5場保持清白之身。
博埋半場0:2、0:3

巴塞喺開鑼戰大勝皇家蘇斯達，喺西超盃首回合又領先皇家馬德里3:2，為新季取得好開始。睇埋佢哋近季對奧沙辛拿嘅往績，就更加有信心，事關「地上最強」過去10次對賽7勝不在話下，當中5場更加係淨勝對手。考慮到巴塞過幾日要踢西超盃次回合，今場肯定想盡快解決對手，一於揀埋巴塞贏2:0、3:0嘅半場波膽。