利物浦使乜驚曼城?

猪拉多纳

英超是日重頭戲由利物浦主場迎戰曼城，雖說利物浦近年「紅風」不再，但爛船尚有三斤釘，過去10次主場對曼城都未輸過，戰績硬淨！曼城有王牌前鋒阿古路因傷缺陣，靠泰維斯攻堅似乎火力唔夠，因此作客讓波好擇使，一於撐利記重振「紅風」，捧「讓球主勝」！（有線300及200台周日晚11時直播）
沉淪二線知恥近乎勇

利物浦曾幾何時屬英超Big4之一，今時今日已淪為二線球隊，欠缺爭標之力。會方今季搵咗史雲斯主帥羅渣士領軍，決心從頭做起，大軍踢法唔同晒，多咗好多短傳，甚具西班牙味道，所以高佬安祖卡路爾被打入冷宮。「紅軍」求變未嘗不好，掂唔掂要慢慢觀察，但喺呢段試驗期預咗要捱。

全新「紅軍」由蘇亞雷斯同波連尼組成矮仔鋒線，兩條友跑動多，走位靈活，反擊速度快，但要改善埋門一腳，唔好再學上季成日中楣中柱怨天怨地。中場新兵祖阿倫實而不華，拍住盧卡斯掃蕩做得唔錯，釋放咗神奇隊長謝拉特策動攻勢，獨忌中堅丹尼爾艾格坐波監影響防守力。
近10次訪晏菲路不勝

曼城反勝車路士捧走社區盾後，開咧戰重演上季煞科日經典場面3比2反勝修咸頓，連續兩場後來居上贏波，士氣當然好。曼城季初靠弗爆嘅阿根廷孖寶阿古路同泰維斯攻堅，但阿古路今仗受傷休戰，泰維斯一個擔唔起成條鋒線，後備箭頭迪斯高同巴洛迪利狀態一般，要喺客場攞3分絕非易事。

自03年5月作客贏波後，曼城此後10次到訪晏菲路再未贏過！「紅軍」上季聯賽戰績極曳，但喺主場面對曼城、曼聯、熱刺及紐卡素等前列球隊都未嘗一敗，證明班波仲有團火，經過首輪聯賽作客西布朗淨吞3蛋後，全軍上下決心打番場爭氣波，績靚戰意好，支持利物浦！至於特別項目，紅軍前鋒蘇亞雷斯個性火爆，率先攞黃牌機會極高。