攻強守弱前鋒鯨魚博大霧

猪拉多纳

今日場日職川崎前鋒主場對名古屋鯨魚，就等於兩隻受傷嘅老虎性命相搏，打死罷就，呢啲波都係簡單啲博1.62倍入球大比較正路。（now635台周六晚6:00直播）
鯨魚3連敗少咗4件

以近況而論，呢兩隊可謂難兄難弟，主隊川崎近8場波只贏過一次，今場仲有後衞實藤友紀第3節腰椎骨裂，小宮山尊信右大腿肌肉撕裂，一齊要抖4個禮拜，巴西中場雲尼山度士隻左腳傷患亦剛啱好得七七八八，夠唔夠狀態落場都未知，主場都冇乜優勢。

鯨魚嗰邊仲衰，聯賽、盃賽3連敗，落後榜首廣島三箭11分，想追難度好大，至弊係中鋒約舒亞堅尼地右膝舊患又復發，丹尼臣哥度巴大髀拉傷咗，丹尼爾施華又陪埋後衞增川隆洋坐波監，前中後總共少咗4件，上星期佢哋恥辱性咁吞咗大阪飛腳5蛋，今個禮拜想反彈都好難。

由於呢兩班波喜歡進攻，防守又唔穩陣，依家又有主將養傷停賽，咁嘅環境唔博大博乜？