窮鬼煲魚生粥 馬拉加勒住碌「卡」博「讓和」

猪拉多纳

今季馬拉加可謂悲喜交集，創會史上首次出戰歐聯就撞正財赤問題，搞到會方要不斷賣星瘦身，雖然以佢哋嘅人腳今晚西甲主場鬥馬略卡依然秤先，但考慮到歐聯後顧，唔排除馬拉加會勒住踢，寧願博3.45倍「讓和」。（now632台周日清晨5:00直播）

繼賣走辛迪卡索拉、荷西朗頓同馬菲臣等球星後，馬拉加嘅瘦身行動仲未結束，意大利中場馬利斯卡尋日操完之後自爆即將離隊，不過守將捷西斯加美斯就話，財政問題佢哋理唔到咁多，最重要係場上做足本分，睇嚟星散對軍心嘅影響唔算特別大。
馬略卡新兵多磨合需時

作客嘅馬略卡人腳肯定唔及馬拉加，計埋新加盟嘅柏度基洛美在內，總共有成6位新兵，磨合都要時間，去到馬拉加唔易砌o架！之不過馬拉加咁等錢使，個心肯定已經飛咗去歐聯戰場，況且佢哋外圍賽首回合以2:0贏彭奈典奈高斯，爭一步就可以躋身分組賽，教練比歷連尼尋日只係安排有份踢歐聯嘅球員進行恢復性操練，今晚亦唔排除會派部分副選出擊，留力周中嘅次回合關鍵戰役，勒住踢隨時煲魚生粥。