維拉拖肥鬥斬波角球多

猪拉多纳

講到投X角球大細，今晚英超有場好嘢，阿士東維拉主場鬥愛華頓，兩隊均大踢英式傳統足球，當然要捧大！維拉新敗今輪返回主場必喪攻，「拖肥糖」剛贏曼聯信心爆棚，肯定同對手死過，雙方拳來腳往瘋狂斬個波入禁區，當然要捧角球大啦！（有線301及201台周六晚10時直播）
對戰曾一場22個角球

投X角球當然要先研究對賽雙方踢法。維拉同愛華頓屬同類球隊，球員均硬橋硬馬粗枝大葉，一樣採用「分邊、落底、出波」呢套英式傳統進攻踢法，可以預計兩軍都會取得唔少角球。睇番對上三次維拉主場迎戰「拖肥糖」，彼此都踢到飛沙劈石，當中兩場不分勝負，反映佢哋實力接近，周時出現搏拳；最少角球嗰場都有12個出現，其中兩年前八月碰頭時，全場更產生22個角球！

另外再睇埋雙方戰意，維拉於新帥林拔帶領下，首戰落筆打三更不敵韋斯咸，今輪首次於維拉公園球場出戰，求勝心一定爆棚。愛華頓則啱啱殺敗曼聯，目前戰意如虹，梗係想斬多四両，今場癲鳳鬥狂龍，角球必捧大！