修咸頓搶分喪攻韋根

猪拉多纳

上周英超開咧，大部分賽果都算正路，相信大家應有啲斬獲。我唔敢買自己愛隊曼聯，最終輸埋；而同市死對頭曼城對修咸頓，都只係敢買大。修咸頓呢隊波場場喪攻，都唔係咁易食㗎！闊別英超七年，修咸頓今晚第一次主場出擊迎戰韋根，對球員及球迷同樣意義重大。聞說今場門票一早已售罄，有咁多粉絲支持，又點可以失威？

（有線302及202台周六晚10時直播）

修咸頓上周作客曼城，表現已博得大家掌聲，半場落後一粒，但下半場後備入替嘅列基林拔同史提芬戴維斯先後有入波，一度反超前2比1。雖然最終被反咬2比3輸波，但對手係上季英超盟主，修咸頓唔怯場之餘仲敢進攻，令呢場波非常悅目。
列基林拔有料到

修咸頓今晚面對中下游嘅韋根，相信可以「夫添」上陣。列基林拔係上季陣中首席射手，今場應該踢正選；另外由般尼加盟、同樣係入球機器嘅積洛迪古斯開咧戰表現都唔錯，值得留意。

歐洲莊家好多都開呢場主隊讓半球高水，以升班球隊來講算讓得狠喇！三支升班球隊中，以修咸頓嘅季初賽程最難踢，一開咧就撞正曼城，今場之後兩場聯賽又要對阿仙奴同曼聯，所以難得今晚對中下游分子，三分志在必得。
Wendy推介

修咸頓 Vs 韋根 主勝