紐卡素今晚打老虎

猪拉多纳

英超名牌球隊車路士開季聯賽兩連勝係威係勢，今次主場對紐卡素繼續受到熱捧，不過，鬼Sir認為呢關絕對唔易過，皆因「喜鵲」班球員夾慣夾熟，而且反擊速度好高，以「車仔」防線近期表現，未必頂得住「黑雙煞」丹巴巴亞同柏比斯施斯，一於扒冷博「讓球客勝」！（有線300及200台周日凌晨零時30分直播）
費托桑馬達未上力

車路士喺社區盾輸畀曼城，近兩場聯賽先後戰勝韋根同雷丁，新兵夏薩特兩場交出五次助攻，呢個比利時球星踢法刁鑽，非常難嘜，但陣中其他攻擊球員狀態唔多突出，「王子」費蘭度托利斯未復舊觀，另一西班牙兵桑馬達腳風亦唔順，主帥迪馬堤奧都知火力不足，有傳佢哋將簽下「韋根美斯」域陀摩西斯。不過，「車仔」上場對雷丁都失兩粒，連門將施治都甩甩漏漏，Ｗ熱到1.36倍真係揀唔落手。

另一邊廂紐卡素延續上季氣勢，首場聯賽擊敗實力分子熱刺，演出仍然對辦，領隊柏杜今夏簽下安尼達及比堅尼馬拿等新兵，基本班底冇乜大變，前面仍重用兩大塞內加爾射手丹巴巴亞同柏比斯施斯，邊路就有賓艾化同約拿斯古迪利斯做側擊，行軍迅速，今場可利用快速反擊突襲對手，正好發揮長處。「喜鵲」日前更於歐霸盃收起大批主將，擺明有心喺今場打老虎！
柏比斯施斯專破車門

此外，鬼Sir仲留意到一點，車路士近季主場對紐卡素根本冇甜頭，對上四次於史丹福橋鬥「喜鵲」錄得兩和兩負，包括上季畀柏比斯施斯兩度射破大門輸０比２。車路士有夏薩特唔係大晒嘅，一於捧「讓球客勝」！