曼聯-1劫富

猪拉多纳

奧脫福夢劇院（The Theatre of Dreams）歷年出現無數巨星，今晚又有兩個重量級球星上演奧脫福處子騷，曼聯主場迎戰富咸，「紅魔鬼」兩大新兵尹佩斯及香川真司強勢登場，經過開咧戰輸波後，一眾球星決心打翻身戰，大軍於主場恰死富咸，今場有望旗開得勝，熱W穩開，可捧埋「讓球主勝」！（有線300及200台周六晚10時直播）

「紅魔鬼」日本新兵香川真司上場對愛華頓正選登場跑動極多，但未有建樹，另一重點收購尹佩斯後備落場冇乜掂波機會，未見真章，兩位英超矚目新兵今次首度於奧脫福獻技，定必加多幾錢肉緊；經過一周磨合後，香川真司、尹佩斯加朗尼呢個攻擊鐵三角實在令人期待。大軍中前場出現人滿之患，快翼拿尼上場踢得曳，難保正選席位，韋碧克同查維亞靴南迪斯料會先任後備。
伊雲斯復出鎮後防

曼聯上場殺聲震天，殊不知畀「拖肥糖」打謝，輸在防線唔齊腳，中場卡域克串演中堅畀爆炸頭費蘭尼頂死，現時里奧費迪南、菲爾鍾斯及基斯史摩寧仍需養傷，但莊尼伊雲斯趕及傷愈復出，可望夥拍尼曼查維迪扼守中路，後防相信會穩陣啲。老費今夏積極招兵買馬，決心重奪聯賽冠軍，首戰落筆打三更，搞到費爵爺冇晒「飛士」，今輪回師主場出擊，3分志在必得！
主場連o趙富咸8鋪

富咸開咧戰以5比0狂數諾域治，新箭頭柏歷梅開二度表現對辦，但對手始終只屬弱旅，而且班波喺主場踢到順晒，所以先贏得咁精彩。不過，富咸離開主場戰鬥力大幅減弱，而且今場要鬥班霸曼聯，搶分難度大增。翻查往績，富咸近8次作客奧脫福全敗，其中6場輸2球或以上，近5次更連1球都入唔到，完全冇得揮，實在欠缺爆冷本錢，分分鐘輪到佢哋畀人大炒。
紅魔熱透

今晚曼聯對富咸，各地菠菜公司睇法頗為一致，除咗「紅魔鬼」主W被壓低至只有1.2至1.3倍之外，連入球大細賠率亦非常接近。以中位數2.5球為例，歐洲主要菠菜公司嘅大盤賠率，只是稍為高過馬會足智彩，細盤相差僅為0.05倍，甚至一樣，似乎預示曼聯好可能大勝。