國米客W賀辛尼迪800戰

猪拉多纳

今晚歐霸盃附加賽首回合其中一場焦點，由羅馬尼亞嘅華斯路伊「主場」迎戰意甲國際米蘭，咪以為前者有地利就可以偷雞，事關華斯路伊個主場唔多合乎標準，所以改咗去附近個較大嘅球場舉行，仲要係賣飛一人一半，根本冇優勢可言。最緊要係國米為慶祝隊長辛尼迪800戰大日子，梗唔想失威，1.65倍客勝咪走雞呀！（開賽時間：周五凌晨2:45）
華斯路伊搬竇失「地利」

華斯路伊係羅馬尼亞二線球隊，目前排喺羅甲第6位，近6戰先贏得1場波，實力同狀態都唔算突出。球隊今晚搬竇出戰，但一啲都冇唔高興，皆因球隊高層只係諗緊點靠國米吸水搵錢，仲將門票兩間會對分，即係話臨場球迷數目差唔多，主場優勢自然冇咁截。

國米呢邊，上一圈對住夏德作客贏完3球，主場輸番2球幾乎出局。球隊上下吸取教訓後，今仗必會打醒百二分精神作戰。球隊目前只得後防主力捷禾養傷，將可強陣出擊。

至於今仗係隊長辛尼迪歷來第800次披起國米戰衣，咁歷史性一刻，可以強陣出擊嘅「藍黑兵團」，相信一班星級隊友如史奈達同大米等，都會打爭氣波送份大禮畀辛隊長啩！