哥本哈根有態唔怕里

猪拉多纳

英超已經開鑼，唔知頭輪賽事你哋有幾多進帳呢？我哋球彩台幾位主持，近日為本季英超進行預測，我就估阿仙奴有咁多主力離隊，今年只可能排中游，不過拍檔兼阿仙奴粉絲「骨健」就話死都唔信阿記排唔到頭四喎。拗就無用喇，我哋決定賭一鋪，若阿仙奴今季排第7以上，我請食飯，相反就佢請；若果啱啱好排第7，就大家無數。各位讀者，你哋撐我哋邊個呀？

其實贏輸事小，都係搵個藉口同一大班朋友食飯開心吓啫，經過周六、日，加埋尋晚嘅英超，今晚就有歐聯附加賽睇，球迷真係唔慌會覺悶啊！
里爾冇咗夏薩特難靠

我就幾鍾意哥本哈根主場對里爾個「讓球主勝」，話晒兩隊近況相若，但主隊有得受讓，真係幾抵買o架。里爾呢隊法甲球隊有好豐富嘅歐洲賽經驗，但今年走咗助攻王夏薩特，始終有一定影響，開季兩場聯賽一勝一和表現未算突出，上場主場對南錫亦贏唔到。

哥本哈根係歐洲賽常客，呢支丹麥班霸今季六場聯賽四勝二和排榜首，而上一輪歐聯外圍賽亦以兩回合一勝一和淘汰布魯日。咁好狀態，仲有得受讓，又點可以走雞？今晚我仲會喺球彩台當值講呢場波啊，大家到時支持吓喇！（有線64及204台周三凌晨2時45分直播）