查爾頓快車搵李着數

猪拉多纳

英冠剛開鑼，次輪就大開周中快車，其中查爾頓主場鬥李斯特城受讓平半，下盤好路。查軍上季稱霸英甲，領隊基斯鮑維有料到，上季主場聯賽不敗率超過九成。「狐狸」本季開局雖佳，但於快車賽程作客讓波兇險，捧查軍下盤！（周三凌晨2時45分開賽）

要寫英冠，我「阿傾」當然要搵老友麥馬拿仁傾吓。我哋都認為李斯特城本季形勢唔錯，只要其主力碧福特、紐根特、高捷斯基等冇傷冇病，就好有機會衝擊升班席位。但開季狀態未去到高峰，抖咗幾日就作客讓波，就千祈唔好掂。

事實上查爾頓雖屬升班球隊，但於英甲已打好基礎，本季有機打上中游或以上。呢班波主場勁有威力，今戰贏埋都唔奇，受讓當然筍爆。
伯明翰夜襲「貓頭鷹」

另一場伯明翰作客錫周三，「貓頭鷹」得戴夫鍾斯領軍，球隊鬥志不俗，但後防仍然不穩。伯明翰無論人腳、經驗都秤先，平手盤可捧。最後睇多場歐聯外圍賽，些路迪始終較希爾星堡高一班，作客開平手盤捧客軍。