拉科老將頂檔難啃奧沙

猪拉多纳

「超級拉科」返嚟喇！呢支昔日能與皇馬、巴塞、華倫西亞於西甲鼎足而立嘅球隊，以乙組第一姿態榮歸甲組，不過今晚主場遇上「豬頭骨」奧沙辛拿唔係咁易啃，仲要讓波真係幾牙煙，奧沙受讓嘅「讓球客勝」更值得捧場。（now 632周二凌晨1時直播）

憑住一眾忠臣如文路爾柏保路、華拿朗、里基等留隊，令拉科魯尼亞上季喺乙組不致於星散，並憑住呢班老將協助球隊只花一季便極速重返甲組。季前該隊又買入艾華度、阿古拿同馬真拿等過氣球員，令整隊平均年齡再度拉高，其中上季搞到維拉利爾降班嘅馬真拿，明顯係轉身慢、冇速度嘅中堅，隨時成為拉科嘅計時炸彈。
升班球隊讓波咪落疊

相反，上季異軍突起嘅奧沙辛拿，演出非常硬淨，今季仲羅致咗蘭奴、施斯干沙利斯及阿利巴斯，今仗至少可全身而退。前幾日另一升班球隊切爾達主場對住馬拉加，竟然要讓波，最終輸波而回，證明升班球隊要讓波信唔過，今仗捧奧沙仲穩陣。