斯朗ACTION!

猪拉多纳

是日英超獨腳戲，曼聯作客愛華頓。「紅魔鬼」上季季尾主場被愛華頓逼和4比4，成為最終失冠關鍵戰役，曼聯主帥費格遜決心重奪英超冠軍，今夏收購上季英超神射手尹佩斯及日本國寶香川真司，開咧首戰帶齊兩大新兵玩轉葛迪遜公園球場，誓要愛華頓血債血償，捧客勝！（有線300及200台周二凌晨3時直播）

曼聯上季同死敵曼城鬥到最後同分輸球差，致命傷係倒數第四輪主場對愛華頓大意失分，「紅魔鬼」戰至82分鐘仍領先4比2，殊不知喺短短兩分鐘內畀謝拉域同派拿連入兩粒逼和4比4，無厘頭失兩分，搞到之後嗰場對曼城壓力超大，結果真係輸埋，奪取第20個頂級聯賽冠軍美夢就此落空，全軍上下肯定憎死愛華頓！
香川尹佩斯處子登場

費Sir向來唔服輸，輸畀死敵曼城更加唔服，所以佢老人家親自出馬落力揀蟀，先搞掂香川真司，呢個日本國寶係多蒙特命脈，畀波射波同樣好掂，喺熱身賽已經頻頻騷哥利，同班隊友夾得幾好。好戲在後頭，臨開咧前老費簽埋阿仙奴前鋒尹佩斯，拍住朗尼組成恐怖鋒線，今次老費帶齊兵器出擊，實搵愛華頓祭旗。
愛華頓難擋魔鬼鋒線

愛華頓今夏放走中場魯迪維爾及卡希爾，前者有質易傷，後者明顯老退，離隊影響唔算好大。主帥莫耶斯引入蘇格蘭箭頭賴史密夫，呢個前格流球員質素唔曳，拍住謝拉域有啲威脅。愛華頓主場表現穩定，但佢哋今場要面對尹佩斯同朗尼，好惡頂，唔好忘記曼聯後備席仲有韋碧克同查維亞靴南迪斯，睇怕「拖肥糖」凶多吉少。