聖日耳門超班W有計

猪拉多纳

Hi！大家好！倫敦奧運完咗唔夠一星期，新球季話咁快又開咧喇，體育傳媒真係忙到冇時停，小妹亦藉住呢個機會，向《太陽波經》班手足講聲多謝，多謝你哋咁有Heart，帶畀讀者一個咁立體同精彩嘅歐國盃同奧運，嚟緊新球季，大家記得繼續支持《太陽波經》喇！

雖未至於好似《太陽》班手足咁忙，但其實Sherry都冇乜時間做自己嘢，除咗接Job，小妹仲轉咗份Office工，要早睡早起，閒時又要睇隔夜波做吓功課，搞到對眼袋又大咗，不過算啦，鬼叫自己興趣係睇波同幫讀者咩，哈！
阿些斯奧冇錢斟「霉度」

好似上星期咁，正當全人類都睇緊奧運嗰陣，小妹就上網搵Link睇法甲聖日耳門（PSG）對羅連安特場波，不過Sherry唔覺得蝕底喎，事關小妹親眼睇住PSG輕敵Hea踢落後兩球，換邊後終於醒覺，伊巴謙莫域仲大發神威連入2粒添，原來呢班波只要的起心肝，喺法甲真係可以橫行霸道o架！

今晚聖日耳門就會造訪阿些斯奧，小妹依然會撐PSG o架！事關上場波失分，全因聖日耳門輕敵之餘，又有中場柏斯托尼同守將堤亞高施華分別因停賽同踢奧運而缺陣，今晚呢兩位猛將齊齊回歸，強陣出擊，又點會搞唔掂有後防大將莫斯達停賽嘅阿些斯奧先？咪忘記阿些斯奧喺季前冇錢增兵，焗住問切塞納借件過氣前鋒「霉度」，但竟然連借用費都畀唔起，憑咩搞搞震呀？一於熱捧PSG個1.52倍客勝啦！

（開賽時間：周一凌晨3:00）
微博傳情：向Sarah致敬

Sarah~Sarah~小妹之前對李慧詩認識唔深，不過嗰晚小妹同班Friend約埋睇直播，睇住「牛下女車神」衝出銅牌，特區旗升起一刻，小妹忍唔住喊！之後嘅爭先賽，雖然Sarah無緣添牌，但佢輸咗仍然甜笑伸脷嗰下，小妹再次喊咗出嚟，事關背負咁大壓力嘅佢，依然可以笑看成敗，Sarah，香港人以你為榮！小妹冇時間考車牌、打麻雀都好，都要踩轉單車，向Sarah致敬！@Sherry