城聖追擊 曼城勢劏聖人攞頭威

猪拉多纳

歐洲各大聯賽戰火重燃，今晚兩支億萬大軍曼城同巴黎聖日耳門（PSG），分途喺英超同法甲出擊，適逢兩位「Winning Girls」強勢回歸，一於全「城」開「P」，齊齊熱捧兩大班霸啦！

新季英超又嚟啦！上季曼城打破咗Big4嘅壟斷時代，喺最後一場戲劇性壓倒曼聯封王，相信呢個情景好多球迷都仲記憶猶新！雖然曼城到呢一刻都仲未有大收購，但其實靠現有班底都夠殺啦！今日喺主場踏出衞冕第一步，對手只係新升班嘅修咸頓，曼城1.45倍「讓球主勝」咪嫌奀！

（有線200、300及廣東體育周日晚11:00直播）

曼城喺英超登頂後反而一改燒錢作風，就算領隊文仙尼公開講過N次話要買人，但波士文梳亞一直當耳邊風，只係求其攞咗啲散紙喺愛華頓買咗件中場魯迪維爾返嚟，的確令好多人大感意外！
修咸頓英冠班底唔夠砌

但大家只要細心啲睇吓，其實曼城係成功留住晒所有主力，泰維斯同迪斯高繼續留隊，配合喺歐國盃表現搶鏡嘅「巴神」巴洛迪利同大衞施華，加埋喺季前熱身賽弗爆嘅阿古路，曼城嘅默契係前所未有咁好，火力Keep住咁猛，一般貨色又點頂得住佢哋？

講到一般貨色，自然要數曼城今場嘅對手修咸頓。外號「聖人」嘅修咸頓終於重返英超，無可否認，佢哋嘅領隊艾堅斯係堅有料嘅，佢哋重返英超後嘅重點收購、上季幫般尼入咗15球嘅射手積洛迪古斯亦稱得上係高效「士哥拿」。之但係任艾堅斯幾有料、積洛迪古斯幾高效，呢啲都係喺英冠嘅事，嚟到英超又係另一回事，重返英超第一仗仲要作客曼城，堅黑仔囉，輸兩粒應該係最低消費喇。
微博傳情：電腦節喇！捧場唷！

大家好！喺暑假期間我參加咗一個主持人比賽，雖然6強止步，但都係一個非常難得嘅經驗，學到好多嘢嘛！比賽完咗之後，我就全職接Freelance做model，啱啱呢個星期仲第一次出Trip去泰國，去咗好多好靚同新開發嘅旅遊景點，寓工作於娛樂！下星期就係電腦節喇，我都去做Promotion girl，大家如果去開電腦節買嘢，記得嚟探我班喎！@Yennie