皇馬大爆發 開咧闖難關

猪拉多纳

西甲頭一輪就有好戲碼，由皇家馬德里主場迎戰華倫西亞，展開衞冕之路。皇馬決心唔使懷疑，「張峰」深信C朗、賓施馬同迪馬利亞等攻擊主力已經磨刀霍霍，但華倫亦唔係好恰，射手蘇爾達杜入球率更係極高，今場作客都有力射破主隊大門。講到咁勁，都係想話畀大家知「大」戰一觸即發，捧2.02倍3.5球入球大喇喂！

（now632台、中央5台周一凌晨1:00直播）
攻擊鐵三角上季入89球

皇馬前鋒線人才濟濟，雖然阿根廷國腳希古恩上季唔係正選，但計實力絕對唔曳。所以皇馬季前已經同佢續新約，人工同賓施馬睇齊，足見重視程度。會方咁識做，希古恩點都會交足貨啦，大家季初真係要𥄫實佢呀！上季佢同C朗、賓施馬組成嘅攻擊鐵三角總共攻入咗89球，「張峰」深信今季會入得更多，特別係希古恩，今場開唔開得成入球大，就好可能要睇佢呀！

大家可能話皇馬喺轉會市場幾乎「零動作」，只係賣人冇買過人，「張峰」就問吓大家覺得皇馬仲有邊個位要買人呢？唔數進攻鐵三角先，中場線嘅基迪拉、奧斯爾同迪馬利亞，上季都仲未踢出自己嘅最高水平，特別係德國國腳基迪拉，之前踢法都係偏向防守，但睇佢喺歐國盃嘅演出有攻有守，為隊友鋪橋搭路不知幾搶鏡，只要佢嚟緊喺皇馬都踢成咁，教練莫連奴開心死啦！
華倫拋售主力一樣掂

對手華倫西亞近年雖然不停賣走陣中主力，要錢唔要人，但依然係歐聯常客，足見呢支「蝙蝠奇兵」幾有料！如果大家見佢哋今季前又賣走佐迪艾巴，就睇少佢哋嘅話，咁就賴嘢喇！冇錯，今場要求佢哋作客贏皇馬係大咬咗啲，不過由蘇爾達杜掛帥嘅佢哋，絕對有能力喺巴拿貝攞到士哥，要兩隊夾埋射入4粒，唔過分啫！
皇馬主場10戰8勝

‧皇馬近10場主場得8勝2和不敗成績。

‧雙方近5次交手皇馬得4勝1和不敗成績。

‧皇馬近7場比賽，半場前至少攻入1球。
皇馬即時着火博先入波

皇馬攻擊力強勁，仲要場場波一開始就全力開火，毫不留手。佢地喺上季聯賽最後10場主場比賽入咗32球，當中有14球喺上半場射入。相反華倫西亞最後10場作客入得8球，火力咁弱睇怕都好難攻破卡斯拿斯嘅五指關。而且皇馬近10次對華倫，有7次係由佢哋先開紀錄，今晚一於追皇馬第一隊入球啦！