巴塞炒皇蘇 坐底三粒

猪拉多纳

上季失落西甲錦標嘅巴塞隆拿，喺新教頭維蘭路華領軍下，今季誓必捲土重來，證明佢哋仍然係「地上最強」。主力射手美斯呢個暑假叉足電，季前熱身賽表現非常搶韁，雖然周中要喺西超盃鬥皇馬，但今晚對手只係實力平平嘅皇家蘇斯達，以巴塞一貫崇尚進攻嘅作風，相信勢必來一場大屠殺壯一壯聲威，巴塞讓二球，「讓球主勝」不容錯過。

（now 632、630及100台周一凌晨3時直播）
維蘭路華求大捷減壓

做得球王，除咗球技精湛外，美斯最吸引球迷嘅地方，就係鬥心十足，從季前熱身賽所見，美斯都表現出好認真嘅態度，一來上季嘅失利，促使佢喺新季有知恥近乎勇嘅決心；二來係呢個暑假美斯唔使為阿根廷國家隊服役，令佢可抖夠叉足電，甚至罕有地跟足巴塞整個夏季集訓，喺有系統嘅催谷下，佢嘅狀態亦冒升得好快，今仗入波實要預埋佢。

自維蘭路華接替哥迪奧拿出任巴塞主帥後，因為珠玉在前，難免受到各方質疑，因此主場對皇家蘇斯達，名副其實係佢嘅「考牌戰」。由於維蘭路華深得陣中球員愛戴，預計眾將必定搏盡，用一場大勝為新帥減壓。
冇重大收購惡唔出樣

再者，皇家蘇斯達係出名嘅「門口狗」，該隊今季除咗買斷墨西哥前鋒卡路士韋拿外，再冇其他重大收購，試問作客魯營又點會惡得出樣？估計呢場巴塞即使多派副選上陣，都坐底贏3粒，斯維一於強捧「讓球主勝」，另「主主」亦可兼投。