飛燕諾3.6倍「和」好「芬」頭

猪拉多纳

荷甲本周有場名帥大戰，由朗奴高文帶領嘅飛燕諾，主場迎戰舊隊友雲巴士頓統率嘅海倫芬。論領軍能力同功績，都係以朗奴高文佔優，雖則話飛燕諾今季冇咗射手約翰古達迪壓陣，惟整體實力始終喺客軍之上，加上主場之利要小勝唔難，一於冷敲3.6倍「讓球和」！（now639台周日凌晨2:45直播）

朗奴高文同雲巴士頓係多年荷蘭國家隊戰友，前者掛靴後曾經帶領阿積士同燕豪芬攞過荷甲冠軍，依家帶領荷甲另一支老牌班霸飛燕諾當然想創一番功績。反觀雲巴士頓雖然教過荷蘭國家隊同阿積士，可惜真正成績就冇乜，今季佢接掌海倫芬都咪期望太高。
海倫芬防線唔掂

事實上，雲帥帶領海倫芬嘅聯賽首戰就吞咗奈梅亨兩蛋，賽後佢鬧班波防守冇深度同缺乏經驗。咁快搵定藉口，睇怕唔使旨意佢哋今場有乜改善。佢哋啱啱係就係簽入冰島箭頭艾費特芬保加臣，上季佢喺瑞超踢到係威係勢17場入12球，不過嚟到水平較高嘅荷甲未必有貨交喎！

睇番主隊飛燕諾，今季放番約翰古達迪返曼城，火力無疑係削弱咗，但同時佢哋由馬拉加簽到荷蘭國腳馬菲臣，此子周中踢完國際賽，今晚有望處子披甲，後防無後顧之憂，前線要入1球攞3分應該唔難。