刨角球？有辦法！

猪拉多纳

1.踢法

一隊波如果重視側擊又有好翼鋒，博到角球嘅機會自然大增，上季角球數目最多嘅利物浦、熱刺同曼聯，佢哋陣中分別有達寧、艾朗連儂、加里夫巴利同艾舒利楊格呢啲好翼鋒，角球自然較多。

2.強隊 Vs 強隊

通常高手過招只要有比數出現，大家都會放開手腳踢得更進取，上季曼城、曼聯及車路士3隊對賽，除咗車路士首循環對曼城，其餘5場總角球數目都達雙位數。

3.主場作客有分別？

主場出擊踢法會較主動進取，攞到角球嘅機會相對多啲，不過諾域治係上季唯一一支作客角球數目多過主場嘅球隊。

4.鋒力弱隊對壘

上季英超入球數排名尾3分別係史篤城、維拉同狼隊，呢3隊共6場對壘，有5場角球數都有雙位數，值得留意。

5.攻防戰

爭標勁旅撞正護級分子注定係攻防戰，角球必多，上季共有13場總角球數超過20個，最經典係煞科戰曼城主勝昆士柏流浪，全場19個角球都由曼城炮製。睇埋上季英超降班3「苦」作客榜首3強，共9場波只得2場角球數係個位數，即係話班霸對弱旅，角球肯定唔會少。